សារអេឡិចត្រូនិច
ច្បាប់​ថ្មី​នៅ​ចិន​ បង្ហោះ​​ផ្សព្វផ្សាយលក់​ទំនិញ​ខុស​ពី​ការ​​ពិត នឹង​ត្រូវ​ផាក​ពិន័យ​


រដ្ឋាភិបាល​​ប្រទេស​ចិន​បាន​ប្រកាស​ចេញ​ច្បាប់​ថ្មី​មួយ ចំពោះ​​វិបសាយ​លក់​ទំនិញ​អនឡាញ ដែល​បង្ហោះ​​ផ្សព្វផ្សាយ​ខុស​ពី​ការ​​ពិត នឹង​ត្រូវ​ផាក​ពិន័យ​ក្នុង​ទឹកប្រាក់​អប្បបរមា​ ៣ មុឺន​ដុល្លារ​អាមេរិក។

ច្បាប់​ថ្មី​នេះ​ត្រូវ​បាន​ប្រកាស​ចេញ​មុន​ប៉ុន្មាន​ថ្ងៃ​ Singles Day ដែល​​ទូទៅ​នៅ​ថ្ងៃ​នោះ​ការ​ទិញ​ទំនិញ Online នឹង​មមាញឹក​ខ្លាំង​នៅ​ក្នុង​ស្រុក។ ឆ្នាំ​ទៅ​ត្រឹម​រយៈ​ពេល ២៤ ម៉ោង ទំហំ​ចំណូល​នៃ​ការ​លក់​ទំនិញ​ទទួល​បាន​ដល់ ១៨ ប៊ីលាន​ដុល្លារ ក្រោម​ការ​បញ្ជា​ទិញ ៦៥៧ លាន​ដង។

ទំនិញ​ភាគ​ច្រើន​ត្រូវ​បាន​ឆ្លង​កាត់​លើ​គេហទំព័រ Alibaba អំឡុង​ក្រុមហ៊ុន​យក្ស​មួយ​នេះ ក៏​បាន​ពង្រាយ​ខ្លួន​ជា​ទីផ្សារ​បោះ​ដុំ ឲ្យ​ក្រុមហ៊ុន​លក់​រាយ​ជា​ច្រើន​ទៀត​ដែល​មាន​មូលដ្ឋាន​នៅ​ទឹកដី​តៃវ៉ាន់​និង​ហុងកុង។ ផ្អែក​តាម​របាយការណ៍​ចំណូល​នៅ​ខែ​សីហា Alibaba ទទួល​បាន​ការ​កើនឡើង​ចំណូល ៥៦ ភាគរយ​បន្ថែម​ទៀត​នា​ត្រីមាស​នោះ។

បញ្ជាក់​ថា​បុណ្យ Single Day ជា​ប្រពៃណី​មួយ​របស់​ប្រទេស​ចិន ដែល​រមែង​ប្រារព្ធ​ធ្វើ​នៅ​ថ្ងៃ​ទី ១១ ខែ​វិច្ឆិកា តំណាង​ឲ្យ​លេខ ១១ ពីរ​ឈរ​អម​គ្នា ព្រោះ​ចង់​បញ្ជាក់​ពី​មោទនភាព​របស់​មនុស្ស​ដែល​នៅ​លីវ​មិន​ទាន់​មាន​គូ​ស្រករ។

ប្រភព៖ BBC