សារអេឡិចត្រូនិច
​ផ្សែង​អ័ព្ទ​​បាន​គ្របដណ្តប់​លើ​ទីក្រុង​ញូ​វ​ដេលី ប្រទេស​ឥណ្ឌា


គ្រោះអាសន្ន​ខាង​សុខភាព​សាធារណៈ ត្រូវបាន​ប្រកាស នៅពេល​ផ្សែង​អ័ព្ទ​ពិបាក​ដកដង្ហើម​បាន​គ្របដណ្តប់​លើ​ទីក្រុង​ញូ​វ​ដេលី ប្រទេស​ឥណ្ឌា កាលពី​ថ្ងៃ​អង្គារ​ទី​៧​វិច្ឆិកា ដោយ​ក្រុម​អាជ្ញាធរ​បាន​បញ្ជា​ឱ្យ​បិទ​សាលាបឋមសិក្សា​ទាំងអស់​ជា​បណ្តោះអាសន្ន​នៅ​ទីក្រុង​ដែលមាន​ខ្យល់​បរិយាកាស​កខ្វក់ បំផុត​នៅ​ពិភពលោក​នេះ​។​

​វេ​ប​សាយ​របស់​ស្ថានទូត​អាមេរិក​បាន​និយាយថា កម្រិត​នៃ​សារធាតុពុល​ឈ្មោះ​”PM2.5″ ដែលមាន​គ្រោះថ្នាក់​ដល់​សុខភាព​នោះ គឺ មាន​កម្រិត ៧០៣ គឺ ជា​កម្រិត​មាន​គ្រោះថ្នាក់​ខ្លាំង​។

​ក្រុម​អាជ្ញាធរ​មូលដ្ឋាន​បាន​ព្រមាន​អំពី​ស្ថានភាព​កាន់តែ​អាក្រក់​ខ្លាំង នៅ​ប៉ុន្មាន​ថ្ងៃ​ខាងមុខនេះ​។​

​សមាគម​វេជ្ជសាស្ត្រ​ឥណ្ឌា​បានប្រកាស​ភាពអាសន្ន​ផ្នែក​សុខភាព​សាធារណៈ នៅពេល​ខ្លួន​បាន​ជំរុញ​ក្រុមមន្ត្រី​គ្រប់គ្រង​ក្រុង​ឱ្យ​ខំប្រឹងប្រែង​ដើម្បី​ទប់ស្កាត់​ការគំរាមកំហែង​នេះ​។​

​ខណៈដែល​កំហឹង​សាធារណៈ​បាន​កើនឡើង​អំពី​វិបត្តិ​នៃ​ការពុល​បរិយាកាស​នេះ លោក​ម៉ា​នី​ស ស៊ី​សូ​ឌា អភិបាលរង​នៃ​ទីក្រុង​ញូ​វ​ដេលី​បាន​បញ្ជា​ឱ្យ​បិទ​សាលាបឋមសិក្សា​ទាំងអស់​នៅ​ទីក្រុង​នេះ​នៅ​ថ្ងៃ​ពុធ​ទី​៨​ខែវិច្ឆិកា​នេះ​។​

​លោក​បាន​និយាយថា រាល់​សកម្មភាព​នៅ​ខាងក្រៅ​ត្រូវបាន​ហាម​ផងដែរ​នៅ​ទូទាំង​សាលារៀន​ចំនួន​៦.០០០​នៅ​ទីក្រុង​នេះ ខណៈដែល​កម្រិត​នៃ​ការពុល​បរិយាកាស គឺ​ស្ថិតនៅក្នុង​កម្រិត​គ្រោះថ្នាក់​នៅឡើយ​៕