សារអេឡិចត្រូនិច
អ៊ីរ៉ង់ និងប៉ា​គី​ស្ថាន​ សម្ពោ​ធ ​ការដ្ឋាន​សង់​បំពង់​បង្ហូរ​ឧស្ម័ន ផ្គើន​នឹង​ទណ្ឌកម្ម​របស់​អាមេរិក​


មេដឹកនាំ​អ៊ីរ៉ង់ និង ប៉ា​គី​ស្ថាន កាលពី​ថ្ងៃ​ចន្ទ​ទី ១១ មីនា  បាន​សម្ពោ​ធ​ការដ្ឋាន​សាងសង់​ផ្នែក​នៃ​បំពង់​បង្ហូរ​ឧស្ម័ន​តម្លៃ ៧,៥ ពាន់​លាន​ដុល្លារ​ ដែល​ត្រូវបាន​ពន្យារពេល​ជា​យូរ​មកហើយ ដែល​ភ្ជាប់​ប្រទេសជិតខាង​ទាំងពីរ ដោយ​ប្រឆាំង​ទៅនឹង​ការគំរាមកំហែង​ដាក់ទណ្ឌកម្ម​ពី​សំណាក់​សហរដ្ឋអាមេរិក។​

​ប្រធានាធិបតី លោក ម៉ាស​ម៉ូដ អា​ម៉ា​ឌី​នេ​ចា​ត បានចាប់ផ្តើម​គម្រោង​ខាងលើ​ជាមួយ​សម​ភាគី​ប៉ា​គី​ស្ថាន​របស់លោក គឺ លោក អាស៊ី​ហ្វ អា​លី ហ្សា​ដា​រី នៅ​ពិធី​មួយ​តាម​ព្រំដែន ដោយ​ជំទាស់​ទៅនឹង​ទណ្ឌកម្ម​របស់​អាមេរិក​មកលើ​វិស័យ​ប្រេង និងឧស្ម័ន​របស់​ប្រទេស​ខ្លួន ។​

​មេដឹកនាំ​ទាំងពីរ​បានបង្ហាញ​ផ្ទាំង​ចារឹក​មួយ​មុនពេល​ចាប់ដៃគ្នា និងធ្វើការ​បួងសួង​ឲ្យ​បញ្ចប់​ដោយ​ជោគជ័យ​នូវ​គម្រោង​ខាងលើ ដែល​ពាក់ព័ន្ធ​នឹង​ផ្នែក​នៃ​បំពង់​បង្ហូរ​ប្រវែង ៧៨០ គីឡូម៉ែត្រ​នៅ​ខាង​ភាគី​ប៉ា​គី​ស្ថាន ដែល​គេ​រំពឹងថា​នឹង​ចំណាយ​អស់​ប្រមាណ ១,៥ ពាន់​លាន​ដុល្លារ។​

​មេដឹកនាំ​ទាំងពីរ​បាន​និយាយ​ក្នុង​សេចក្តីថ្លែងការណ៍​រួម​ថា "​ការបញ្ចប់​បំពង់​បង្ហូរ​ឧស្ម័ន​នេះ​ គឺ​ដើម្បី​ប្រយោជន៍​សន្តិភាព សន្តិសុខ និងការអភិវឌ្ឍន៍​របស់​ប្រទេស​ទាំងពីរ ... វា​ក៏​នឹង​ពង្រឹង​ផងដែរ​នូវ​ទំនាក់ទំនង​សេដ្ឋកិច្ច នយោបាយ និងសន្តិសុខ​នៃ​ប្រទេស​ទាំងពីរ​" ។​

​លោក​អា​ម៉ា​ឌី​នេ​ចា​ត​ បានទទួល​ស្គាល់​ការពិត​ថា ការងារ​លើ​ផ្នែក​ថ្មី​នៃ​បំពង់​បង្ហូរ​ឧស្ម័ន​នេះ​នឹង​បន្ត​ប្រព្រឹត្តទៅ ថ្វីបើ​មានការ​ដាក់ចេញ​នូវ​ទណ្ឌកម្ម​របស់​អាមេរិក​ប្រឆាំងនឹង​វិស័យ​ប្រេង និងឧស្ម័ន​របស់​អ៊ីរ៉ង់​ជុំវិញ​កម្មវិធី​នុយក្លេអ៊ែរ​ដ៏​ចម្រូងចម្រាស​របស់ខ្លួន​ក៏ដោយ ។​

​លោក​អា​ម៉ា​ឌី​នេ​ចា​ត ​បាន​និយាយថា "​បំពង់​បង្ហូរ​ហ្គាស​នេះ​គឺជា​ការបង្ហាញ​ការតស៊ូ​ប្រឆាំងនឹង​ប្រទេស​មហាអំណាច ។ មាន​ប្រទេស​មួយចំនួន​ដែល​ប្រឆាំងនឹង​ការរីកចម្រើន​របស់​ប្រជាជន ហើយ​ដូចនេះ​ពួកគេ​កំពុងតែ​ប្រើប្រាស់​បញ្ហា​នុយក្លេអ៊ែរ​ដើម្បី​ជា​លេស​រារាំង​ការអភិវឌ្ឍ​របស់​ប្រទេស​ទាំងនោះ​" ៕